Faiz Ahmed Faiz

"Raat yoon dil maiN teree khoee hooee yaad aee...
Jaisay veeranay maiN chupkay say bahar aa jaey...

Jaisay sehra maiN holay say chalay baad-e-naseem...
Jaisay beemaar ko bevajah qaraar aa jaey..."

Dono jahaaN teri mohabbat maiN haar kay
Woh jaa raha hai koee shab-e-GHam guzaar kay

VeeraaN hai maikadah KHam-o-saaGHar udaas hai
Tum kya gaey keh rooTh gaey din bahaar kay

Ik fursat-e-gunaah milee, woh bhee chaar din
Dekhay haiN hum nay hauslay parvar-digaar kay

Dunya nay teri yaad say baiganah kar diya
Tujh say bhee dilfaraib haiN GHam rozgaar kay

Bhoolay say muskuraa to deeay thay woh aaj 'Faiz'
Mat poochh valvalay dil-e-na-kardahkaar kay

Dasht-e-tanhaee maiN ai jaan-e-jahaaN larzaaN hai
Teri aavaaz kay saaey, teray hontoN kay saraab
Dasht-e-tanhaee maiN dooree kay khas-o-khaak talay
Khil rahay haiN teray pehloo kay saman or gulaab

Uth rahee hai kaheeN qurbat say teri saaNs kee aanch
Apnee khushboo maiN sulagti hooee madham madham
Door ufaq paar chamaktee hooee qatra qatra
Gir rahee hai teri dildaar nazar kee shabnam

Is qadar payaar say ai jaan-e-jahaaN rakha hai
Dil kay rukhsaar pay is waqt teri yaad naiN haath
YooN gumaaN hota hai gerchay hai abhee subh-e-firaaq
Dhal gaya hijr ka din aa bhi gaee wasl ki raat

Hum par tumharee chaah ka ilzaam hee to hai
Dush-naam to nahiN hai, yeh ikraam hee to hai

Kartay haiN jis peh ta'an, koi jurm to nahiN
Shauq-e-fuzool-o-ulfat-e-nakaam hee to hai

Dil na-umeed to nahiN, na-kaam hee to hai
Lambee hai GHam ki shaam, magar shaam hee to hai

Dast-e-falak maiN, gardish-e-taqdeer to nahiN
Dast-e-falak maiN, gardish-e-ayaam hee to hai

Raaz-e-ulfat chhupa kay dekh liya
Dil bohot kuch jalaa kay dekh liya

Woh meray ho kay bhee meray na hooay
Un ko apna bana kay dekh liya

Aur kya dekhnay ko baaqi hai
Aap say dil laga kay dekh liya

'Faiz', takmeel-e-GHam bhee ho na sake
Ishq ko aazma kay dekh liya

Na ganvao navak-e-neem-kash, dil-e-rayza rayza ganva diya
Jo bachay haiN sung samayT lo, tan-e-daagh daagh luta diya

Meray chaarah gar ko naveed ho, saf-e-dushmanaaN ko khabar karo
Wo jo qarz rakhtay thay jaan per, wo hisaab aaj chuka diya

Karo kaj jabeeN pay sar-e-kafan, meray qaatiloN ko gumaaN na ho
Keh gharoor-e-ishq ka baankpun, pas-e-marg hum naiN bhula diya

Udher aik harf keh kashtni, yahaaN laakh uzr tha guftani
Jo kaha to sun kay uRa diya, jo likha to paRh kay mita diya

Jo rukay to koh-e-garaaN thay hum, jo chalay to jaaN say guzer ga'ay
Rah-e-yaar hum naiN qadam qadam, tujhay yaadgaar bana diya

GuloN maiN rang bharay, baad-e-naubahaar chalay
Chalay bhi aao keh gulshan ka karobaar chalay

Qaffas udaas hai yaro, saba say kuch to kaho
KaheeN to behr-e-KHuda aaj zikr-e-yaar chalay

Kabhi to subh teray kunj-e-lab say ho aaghaaz
Kabhi to shab sar-e-kaakul say mushkbaar chalay

BaRaa hai dard ka rishta, yeh dil ghareeb sahee
Tumhaaray naam pay aaeN gay GHamgusaar chalay

Hooa jo teer-e-nazar neemkash to kya hasil
Maza to jab hai keh seenay kay aar paar chalay

Jo hum pay guzri so guzri magar shab-e-hijraaN
Humaray ashk teri aaqibat sanwaar chalay

Huzoor-e-yaar hui daftar-e-junooN ka talab
Giraah maiN lay kay garaybaaN ka taar taar chalay

Maqaam 'Faiz' koi raah maiN jacha hee nahiN
Jo koo-e-yaar say niklay to soo-e-daar chalay