Iftikhar Arif

"Meray KHuda mujhay itna to mo'tabir kar day
MaeN jis makaan maiN rehta hooN us ko ghar kar day"

Meray KHuda mujhay itna to mo'tabir kar day
MaeN jis makaan maiN rehta hooN us ko ghar kar day

Yeh roshnee kay ta'aqqub maiN bhagta hooa din
Jo thak gaya hai to ab is ko mukhtasar kar day

MaeN zindagi kee duaa mangnay laga hooN bohot
Jo ho sakay to duaaon ko bay asar kar day

Sitara-e-sehree doobnay ko aya hai
Zara koi meray sooraj ko baKHabar kar day

Meree zameen, mera aakhree havalah hai
So maeN rahooN na rahooN is ko barvar kar day

MaeN apnay khwab say kat kar jeeyoon to meray KHuda
UjaaR day meree miTTee ko darbadar kar day

Deyaar-e-noor maiN terah shaboN ka sathi ho
Koi to ho jo meree vehshatoN ka sathi ho

MaeN us say jhoot bhee bolooN woh mujh say sach bolay
Meray mizaaj kay sab mausamoN ka sathi ho

Woh meray naam kee nisbat say mo'tabir THehray
Gali gali meree rusvaeeyoN ka sathi ho

MaeN us kay haath na aooN woh meray saath rahay
Meray suroor, meree mehfiloN ka saathi ho

Woh khwab daikhay to daikhay meray hawalay say
Meray khayal kay sab manzaroN ka sathi ho